كتالوج الزوجة المصرية

[ملاذ أمن]

كتالوج الزوجة المصرية
كما هو متعارف عليه
والاهم من ذلك انه كتالوج لكل ماهو حواء فى الوطن العربي..
فلنبدأ


دا النموذج المنتشر عندنا في مصر، أو النوع الرسمي للزوجات، حاجة كدا زي شاي العروسة ..
دي سـت مطحونة في شغل البيت وطالع عينها مع العيال وابوهم لحد ما بتنسى انها ست أصلا، وتحس ان علاقتها بجوزها خدت شكل أخوي كدا جميل، حتى تلاقيها على طول وهي بتتكلم مع جوزها تقوله يا اخويا ..
هي مش عايزة حاجة مستحيلة، هي عايزة حد يدلعها بس شوية، يقولها كلمتين حلوين، يجيبلها ورد ..
خدوا بالكم من الستات دي يا جماعة عشان تعبـانين جدا ..


دي الزوجة المتواكلة ..
هي حلوة وهتجيب رجلك وهتتجوزها بس بعد كدا هتحس انك شايل أتب على ضهرك ..
مبتعرفش تفتح برطمان صلصة لوحدها ..
معتمدة على جوزها في كل حاجة في الدنيا حرفيا ..
خد بالك دي بتكون باينة من الخطوبة بس انت اللي مبتركزش ..
يعني لو لقيت خطيبتك بتكلمك بالليل وبتقولك نيمني اخلع من العلاقة دي وش، عشان دي بعد الجواز هتقولك شطفني ..



دي بقى فاهمة ان العالم كله مركز معاها هي وجوزها ..
تلاقيها متجوزة فردة شبـشب بس مقتنعة ان كل السـتات باصينلها فيه ..
ولادها كلهم ساقطين وفشلة بس هي شايفة أنهم محسودين ..
تتاوب فتقولك اصلي محسودة، تلاقي شقتها فيها نمل فتقولك محسودة، تنسى المحشي على النار لحد ما يتحرق تقولك الولية ام عاطف جارتنا كانت باصالي في الكرنبة وانا داخلة بيها البيت ..
بتتردد على ست كدا بتقرالها الفنجان، اسمها ام زينب، أم مصطفى، الشيخة وئام، حاجة في السكة دي ..
تلبس جوزها الفانلة بالمقلوب وتلبس العيال احجبه عشان الحسد، وتمشي في البيت تولـ.ـع بخور وترش ملح عشان الناس الأشـ.ـرار بيعملولها اعمال بتخليها تشوف جوزها حمار، مع إن هو أصلا في الحقيقة حمار، من غير أعمال ولا نـيلة ..



دي اول ما جوزها يروح الشغل تتلم على الجيران بقى ويعملوا أكتيڤيتي لطيف أوي، يقعدوا يجيبوا في سيرة الناس ..
دي تسليتهم المفضلة ..
وفلانة اتجوزت وفلانة اتطلقت وفلانة امها طلعت مبتخلفش ..
وتتضايق جدا من الجارة الانطوائية اللي مبتحبش تخلي حد يعرف حاجة عن حياتها، تفضل تبرم وراها وتجرجرها في الكلام عشان تسحب منها معلومات، كان فيه حاجة اشاء الله ؟ ..
في كل شارع في مصر جارة زي دي، تتمتع بنظرة ثاقبة وعينها زي جهاز الإكس راي، بيبعت أشعة غير مرئية تعرف الكيس اللي في إيدك دا جواه إيه ..

يتبع ​

 

[ملاذ أمن]

الزوجة الإندبندنت، دي بتشتغل وبتقبض بس محدش يعرف حاجة عن فلوسها، وجوزها ميقدرش ياخد منها جنيه، بس هي تقلبه زي ما هي عايزه عشان هي الست وهو الرlجل ، بس لو قالها اعمليلي كوباية شاي تقوله ما تقوم اعمل لنفسك هو انت اتشـليت ودا عشان مفيش حاجة اسمها رlجل وست ..
لو راكبة معاك المترو وانت قاعد وسايبها واقفة ممكن تصورك وتخليك لبانة السوشيال ميديا عشان انت نطـع ومش مقدر انها ست وانت رlجل، بس بتطالب بالمساواة مع اخوها في الميراث عشان مفيش حاجة اسمها رlجل وست ..
بتتمرد على قوانين الدولة اللي بتظلم الستات وبتدي الرlجل الحق يتجوز عليها عشان مفيش حاجة اسمها رlجل وست بس لما بتتطلق بترفع على جوزها 40 قضية وبتاخد منه الشقة والعفش والعيال والنفقة وكليته اليمين عشان هي الـست وهو الرlجل.



دي طيبة وبنت حلال وجميلة وبسمسم ..
دي زوجة محصلتش، تشوفها كدا قلبك ينشرح، بس متفتحش بؤها، لأنها أول ما بتتكلم بتعمل كارثة ..
ممكن مثلا تهزر مع ابوك بشتيمة وهي مش فاهمة أنها كدا بتشتمه ..
ممكن تتريق على شكل امك وهي فاهمة أنها كدا روشة وبتهزر معاها ..
ممكن تحرجك في وسط اصحابك ..
قلبها ابيض بس لسانها بيعمل كوارث.



دي بنت ناس ومن عيلة محترمة، الزوجة اللي الانجليزي بتاعها كويس ..
شيك جدا وتشرف وهتربيلك ولادك أحسن تربية وهتربيك انت كمان معاهم ..
أكتر جملة هتسمعها منها واتش يور لانجويتش ..
لو ابنك قالها يا ماما مش يا مامي هتقيم عليه حد الزنا ..
ولو انت عملت صوت وانت بتاكل، أو وانت في الحمام، أو وانت عايش عموما هتكدرك وتسمعك محاضرة في الإتيكيت ..
بتعلق على لبسك وتناسق ألوانه مع بعضها، وعلى اصحابك عشان فيهم ناس مش قد المقام .. وعلى طريقة كلامك علشان بلدي سيكا ..
هتهري معدتك أكل ملعبك من بتاع الفنادق دا، وريقك هينشف جنبها عشان تعملك شوية ملوخية بالتوم كدا من اللي تجيب البوليس دي .



دي بتبقى بنت حظها اداها الجمال والرشاقة والأناقة والحداقة وجه على المخ وقالها هاتي البتاع دا مش هتحتاجيه في حاجة ..
لما بتيجي تتجوز بتترجت على عريس غني ومعندوش أي ميزة تانية تقريبا غير أنه معاه فلوس كتير ..
بالفلوس دي بقى هي بتزرعله مزايا محدش غيرها شايفها فيه ..
دي جوازتها ناجحة طول ما الكارت لسه بيسحب .

يتبع.. ​

 

[ملاذ أمن]

محدثة الجواز ..
الأكونت بتاعها على الفيس اسمه زوجي قرة عيني، أو زوجي ضياء قلبي، أو زوجي قرش البحر، أو زوجي ثعلب الصحراء، أي حاجة في السكة دي ..
الاستوري بتاعتها على الواتس اب كلها أدعية لجوزها، مع انها ممكن تصلي ركعتين وتدعيله عادي مش لازم على الواتس، بس هي طبعا حريصة انها تعرف كل الناس قد ايه هي بتحب جوزها، وبالمرة تعاير صاحباتها اللي لسه ما اتجوزوش ..
لو قعدت مع واحدة صاحبتها تقعد تلعب في الدبلة وترن على جوزها تشوفه اتشطف بعد ما عمل حمام وللا نسي، وبتقول كلمة جوزي 6000 مرة في الدقيقة ..
دي محتاجة حد يفهمها ان أنثى العنكبوت بتتجوز عادي فدا مش إنجاز يعني تفتخر بيه .



دي الزوجة صيادة الفرص ..
الحياة عندها فرص، تقفشك كدا في ساعة صفا وتدبسك في جمعية ب 1200 جنيه ..
تعرف ان جارتهم الجديدة بتشتغل دكتورة تاخد العيال كلهم وتروح تكشف عليهم ببلاش ..
تعرف واحد قريبهم فتح سوبر ماركت، تروح تشتري من عنده أي حاجة أرخص من برا ..
تعرف ان صاحبتها اتجوزت ظابط تروح تلبس جوزها قضية ..
عايشة الحياة زي الطفل بتاع لعبة سابواي، ماشية تلم فرص ..
متعرفش تهزر وعندها قدرة فظيعة على قتل الإفيه، ودا لأن شخصيتها العملية قضت على حس الفكاهة جواها .



دي حلم كل رlجل مصري ..
تدلع جوزها وتسمعه كلام حلو وتحسسه أنه سي السيد ..
تعمله الأكل اللي بيحبه، تعمله مساچ، تعمله جو رومانسي، تعمله البحر طحينة ..
بتديله منابها في اللحمة، وتغسله رجله بماية وملح ..
تسكت لما تحس انه مش عايز يتكلم، وتتكلم لما تحس انه عايز يتكلم ..
كل الرجالة نفسهم في واحدة زي دي عشان الرlجل كائن أناني بطبعه فمحتاج ست تنسى نفسها خالص وتعيش علشانه هو ..
بس لو ماتت ولا كأنه كان يعرفها .



دي لو جارتك اللي في الدور التاني وانت ساكن في الخامس صوتها هيعيش معاك في شقتك ..
طول النهار يا بتزعق لجوزها، يا بتزعق للعيال، وربنا يكون في عون اللي يتجوزها يعني.

يتبع.. ​

 

[ملاذ أمن]

دي الزوجة الصفرا ..
موطنها الأصلي بيت العيلة، اول ما تدخل البيت تدخل بالحنجل والمنجل ومتسألنيش الكلام دا يعني ايه ..
تتدحلب لحماتها ولاخوات جوزها وتحطهم في جيبها، تدي أسافين لسلايفها عشان يطلعوا كلهم وحشين وتطلع هي الملاك ام جناحين ..
هتلاقيها اكتر واحدة محبوبة في البيت علشان اكتر واحدة سهنة .



دي الزوجة المسخرة ..
طول النهار أيفيهات أفلام ونكت وحاجة اخر مهلسة ..
مبتعرفش تنكد، بتشتري دماغها، حاسة ان الدنيا قصيرة ومش مستاهلة بقى نقـرف نفسنا ..
لو عرفت ان جوزها بيخونها حتى هتقوله يا رlجل انبسط محدش واخد منها حاجة ..
دي في الغالب بتجيب أجل جوزها وبتفضل عايشة بعده عشرين سنة على الأقل .



الزوجة اللي مبتعرفش تطبخ ..
ودي يا هتعيشك على التيك اواي يا هتجيب امها كل يوم والتاني تطبخلها ..
الغريبة بقى أنها ليل ونهار مشغلة برامج الطبيخ في التليفزيون وعمرها ما عملت صنف واحد من اللي بتتفرج عليه .


دي حاجة كدا والعياذ بالله ربنا يحفظ بناتنا وسـتاتنا جاية من الجنة ..
ست عاقلة، كاملة، جميلة، شيك، عارفة حقوق جوزها، بتعرف تكون زوجة وتعرف تكون حبيبة، تقف في ضهر جوزها لحد ما تكبره وتعليه وتعمل منه رlجل محترم ..
رومانسية ..
مخلصة ..
بتطير ..
بتقول بابا وماما ..
فيها كل الأوبشنات اللي في الدنيا بس بتتجوز واحد شلحف.



دي الست النكدية ..
بتعشق المعاناة، تموت في مصطفى كامل، حلم حياتها تشوف كل الناس تعساء، لونها المفضل الإسود، مش في اللبس بس، لا في الحياة عموما ..
تقابل جوزها وهو لسه طالع على السلم وتقوله إلحق يا مصطفى، خالتك سميحة وراكها اتحرقت ..
بتشغل برامج الحوlدث والجرlيم طول اليوم وتحكيها لجوزها لما يرجع عشان هو طبعا مخنوق من السعادة اللي مالية حياته ومحتاج يكسرها بشوية نكد ..
دي اللي لو شافت جوزها مبسوط شوية ممكن تقوله فاكر لما امك مـاتت ..
بتتغذى على الحزن، وبتقدر تطوره وتغرق بيه الناس اللي حواليها .

خلصنا الحمدلله ​

 

[جلينار]

.


خلاص بموت والله النسوان زي بعضهم ويين متروح
مو بس المصريات

يعطيك العافيه لظرافة طرحك

 

[سمارة]

لي عودة لقراءة الموضوع باذن الله
تحية حب واحترام للمرأة المصرية
المرأة المصرية ست الستات
تحية لجميع نساء الارض
يسلمو اخي

 

[كاسيوبيا]

_



أبووو الجمال يا أخوان،أخذت ماجستير بعلم المرأة
أما النكدية ومحدثة الزواج هذولا حكاية لحالها


سلمت الطرح أخي